Pellaa teatteria
Oleks’ kiinostunu teatterin pellaamisesta? Ehkä sie tykkäät kirjottaa, laulaa, neuloa, nikkaroija ja seurustella teatteri-apinoitten kans? Tule följhyyn kehitämhään meän kans!
Meilä oon aina joku amatööriprojekti käynnissä. Se saattaa olla revyy, joku vanha tunnettu näytelmä tai aivan uusi käsikirjotus. Tornionlaakson teatterilla oon teatteriryhmät kaikissa meän jäsenkunnissa: Kieruna, Pajala, Matarengi ja Haaparanta.
Teatterijohtajat tekkee yhteistöitä kunnan kans ja tarjoaa lapsile ja nuorile maholisuuen olla myötä ryhmissä joka oon yhtä pitkät ko koulun lukuvuosi. Kaikki toiminta sovitethaan johtajan ja osallistujien ideoitten ja tieton mukkhaan. Välilä oon isompia näytelmiä käynnissä ja joskus met tarjoama työpajoja tai muita tapahtumia.
Hoks! Sulla ei ole pakko osata meänkieltä liityäksheen meän ryhmiin tai näytelmhiin. Mutta, se oon soma jos sie tykkäät kielestä ja olet utelias oppimhaan enemmän siitä. Samala ko harjoat repliikkiä niin opit meänkieltä.
Lue lissää menyystä.
Amatööriteatteri Seittenkaaressa, septämperissä 2018
Pantemia vaikuttaa meitä
Koronaviirys vaikuttaa meän toimintaa. Useammat ryhmät oon häätynheet perua näytelmät ja muutama näytelmä oon filmattu ette uletuu pybliikile digitaalisesti. Muutama ryhmä freistaa harjotella viiteo-möötin kautta. Emmä met anna perile niin helposti. Pitäkää peukkoja ette koronaviiryksen leviäminen päättyy ette met saama kohata meän pybliikin uuesti.