Prujekti oon yhteistyö Tornionlaaksonteatterin, Teater16, Riksteatern Barn & Unga, Riksteatern Norrbotten ja Pajala Unga Riksteaterföreninkin välilä. Teater16 jokka huseeraa Ljungbyyssä Koronobergin läänissä oon siittä saakka ko Allmänna Arvsfonden myönsi heile 5.5 miljuunan tuen, initieeranu yhteistyön Tornionlaaksonteatterin kans freistaen kehittää keinon kuinka nuoret vois tehhä podditeatteria ittele ja muile nuorile. Tämän prujektin kautta met halvama ulettua laajemalle kohteryhmäle nuoritten kulttuuriharrastajien kesken. Prujekti käänty varsinaisesti niile jokka ei tavalisesti halva tai ei voi osalistua erhiin ryhmäaktiviteethiin. Meininki oon ette kehittää työkeinoja jokka poistaa erinlaisa osalistumisen esteitä niin ette useampi tuntee ette het oon osa meän toiminassa.
Yks tärkeä päämäärä tässä prujektissa Tornionlaaksoteatterin kohalta oon ette nostaa esile tornionlaaksolaista itenttiteettiä, meän kieltä ja meän kulttuuria.
Syksylä 2020 tehtiin 2 työpajahäliä Pajalassa missä nuoret opit raatiuteatterhiin kuuluvaa tekniikkaa ja sait kans keksiä tarinoita joila oli yhteys Tornionlaakshoon. Konseptia kehitethään vuoen 2021 aikana käyttökelpoiseksi työkaluksi teatterityössä nuoritten kans.
Jos sulla oon kysymyksiä niin sie voit meilata meän prujektijohtajalle, Gudrun Skogsberg, gudrun(at)tornedalsteatern.se
